2018 жылғы 24 сәуірде Оңтүстік Қазақстан облысындағы Экологиялық орталықта «Рухани жаңғыру» бағдарламасы аясында «Табиғатты аяла» жас өлкетанушылар, экологтар мен табиғат зерттеушілерінің облыстық форумы өткізілді.
Форум білім алушыларды табиғатты қорғау қызметіне тарту, экологиялық мәдениетті және туған өлке табиғатына экологиялық бағдарланған қатынасты тәрбиелеу мақсатында өткізілді. Іс-шараға облыстың Шымкент, Арыс, Түркістан, Кентау қалаларының және Төлеби, Отырар, Ордабасы, Сарыағаш, Созақ, Мақтаарал, Сайрам, Қазығұрт, Шардара, Бәйдібек, Түлкібас аудандарының 14-16 жастағы жалпы білім беретін мектептерінің білім алушылары қатысты.
Форумға 172 жұмыс 8 номинация бойынша қабылданды.
«Туған өлкені зерттейміз», «Жасыл экономика», «Денсаулық және қоршаған орта» номинацияларында білім алушылар табиғат ресурстарын тиімді қолдану, қорғау және қорық аймақтары мен табиғи ескерткіштерді зерттеу, қоршаған ортаның адам денсаулығына әсері жайында жүргізген жұмыстарын қорғады.
«Экоәлем», «Қызыл кітап беттерінен» номинацияларында туған өлке өңірінде кездесетін өсімдіктер мен жануарлар, олардың «Қызыл кітапқа» енген түрлері және көркейту, көгалдандыру бойынша жүргізілген экологиялық жұмыстарының презентациялары қорғалды.
«Мерейтойыңмен, Астана!», «Қалдықтардан табыстарға...» номинацияларында білім алушылар табиғи және қалдық заттардан жасалған шығармашылық жұмыстарымен таныстырды.
Экологиялық квест «Табиғаттың құтқарушы шеңбері» номинациясында экология-биология бағыттары бойынша қойылған тапсырмаларды білім алушылар топпен қорғады.
Іс-шараға қатысқан жұмыстарды жоғары дәрежелі қазылар алқасының құрамы сараптап, жүлделі орын иелерін анықтады. Жеңімпаздар дипломдар және арнайы сыйлықтармен марапатталды.