«Астана Опера» театрының труппасы ашық аспан астында 10-ға жуық тегін концерт бермек

ҚР Мәдениет және спорт министрлігі мен Нұр-Сұлтан қаласы әкімдігінің көмегімен «Астана Опера» театрының труппасы ашық аспан астында 10-ға жуық тегін концерт бермек. Елорда тұрғындары мен қонақтары қала алаңдары – Мәмбетов көшесіндегі Аффари БО алды мен Орталық қалалық саябақтағы амфитеатр сахнасында асқақ өнермен қауыша алады.

- Шығармашылық ұжымымыз алғаш рет ашық алаңда өнер көрсеткелі тұрған жоқ. Жыл сайын Дж.Вердидің «Аида» операсы сынды ғаламат спектакльдерді ашық аспан астында орындап жүрміз. Осындай жобалар ағартушылық сипатта жасалып, қазақстандықтарды асқақ өнерге тартуға бағдарланған. Жанға жайлы әрі мерекелік көңіл-күй сыйлаймыз деген сенімдеміз. Бірқатар тосынсый әзірледік, олардың бірі – Италия, Швейцария, Жапония, Ресей мен Чехиядан келген шетелдік әртістердің өнер көрсетуі, - деді «Астана Опера» театрының директоры, Қазақстанның еңбек сіңірген қайраткері Ғалым Ахмедьяров.

Концерттердің бағдарламасы ересектерге де, балалар аудиториясына да қызықты болатындай етіп ойластырылған. Сөйтіп, жас көрермендерді 13 және 19 маусым күндері сағат 12:00-де Аффари сахнасында өтетін «Балалар сыйға тартқан өнер» атты концерт күтуде. Әр күндері балаларға жарқын балеттік және хор нөмірлері ұсынылады. Балалар театрлық студиясының жетекшісі – Алтынғаным Ахметова.

13 маусым сағат 20:00-де Аффари сахнасында өтетін «Вокалдық музыка жауһарлары» концерті жексенбілік кештің романтикалық әсерін арттыра түспек. Көпшілік назарына опералардың белгілі ариялары мен дуэттері, танымал халық әндері мен романстар, аспаптық пьесалар ұсынылады. Музыкалық жауһарлар «Астана Опера» театрының опера солистері мен оркестр әртістерінің орындауында тыңдарманға жол тартады.

Абзал Мұхитдиннің көрерменнің көңілінен шыққан «Жылдың сегіз мезгілі» (А.Вивальди, А.Пьяццолла) авторлық концерті 12-13 маусым сағат 20:00-де Орталық қалалық саябақтағы амфитеатрда өтеді. Антонио Вивальдидің «Жыл мезгілдері» және Астор Пьяццолланың шығармалары – өз заманындағы, сондай-ақ қазіргі таңда да өзекті музыка мәдениетінің ең жарқын құбылыстарының қатарында. Солистер – «Астана Опера» симфониялық оркестрінің бірінші скрипкалары Бағдат Әбілханов пен Айсұлу Байкенова.

Апта соңында 26 және 27 маусым күндері сағат 20:00-де Орталық қалалық саябақтағы амфитеатрда қала тұрғындарының назарына Опера-гала ұсынылмақ. «Астана Опера» театрының жетекші опера солистері, хор әртістері мен симфониялық оркестрі қазақстандық авторлар мен батыс еуропалық классик композиторлардың опералық ариялары мен дуэттерін, аспаптық әрі хорға арналған шығармаларын ұсынады.

Сонымен қатар «Астана Операның» бірегей жобасы – «PICCOLO» театры 5 шілде күні сағат 20:00-де қалалық саябақта өз репертуарының інжу-маржаны – Гаэтано Доницеттидің «Дон Паскуале» екі бөлімді драма-буффасын ұсынады. Қоюшы дирижер – Қазақстанның еңбек сіңірген қайраткері Абзал Мұхитдин, қойылымның көркемдік жетекшісі – Алла Симонишвили, сценограф әрі костюмдер бойынша суретші – Манана Гуниа. Орындаушылардың жұлдызды құрамы елордалық жұртшылық көңілін қуантпақ. Норина –Либуше Санторисова (Чехия), Эрнесто – Эцуо Дои (Жапония), Малатеста – Алексей Шаповалов (Ресей), Дон Паскуале – Антуан Бернхейм (Швейцария), Карлито – Ерұлан Кәмел. Дирижер – Коррадо Вальво (Италия). Астана күнінде, 6 шілдеде Орталық қалалық саябақтағы амфитеатр сахнасында мерекелік Гала-концерт өтеді, онда «Астана Опера» театрының жетекші опера солистері, хор әртістері мен симфониялық оркестрінің орындауында қазақстандық авторлар мен батыс еуропалық классик композиторлардың танымал опералық ариялары мен дуэттері, аспаптық әрі хорға арналған шығармалары шырқалады.