Оқушылар сарайы 2011 жылы желтоқсанда Қазақстан Республикасы Президентінің тапсырмасымен салынды. Қазіргі кезде онда 9 мыңнан астам баланы қамтитын 109 үйірме жұмыс істейді. Әділбек Жақсыбеков мекеме басшысына үйірмелердің және секциялардың қолжетімділігіне, балалардың демалыстарын қызықты өткізулеріне назар аударуды тапсырды, сондай-ақ ата-аналардың балаларын секциялар мен үйірмелерге жазу кезінде ешқандай қиындықтарға тап болмауы тиіс екендігін айтты. Сондай-ақ Астана әкімі жаңа №64 балабақшада болып, арнайы жабдықталған медициналық кабинетте өткізілетін емдеу-оңалту және қалпына келтіру процедураларымен танысты. Балабақша 2012 жылы ашылған, қазіргі кезде онда тірек-қимыл аппараты бұзылған мүмкіндігі шектеулі 164 бала оқиды. Мекемеде логопедтер мен дефектолог мамандығын меңгерген тәрбиешілермен қоса, педиатр, физиотерапевт, ортопед және т.б. дәрігерлер жұмыс істейді. Балабақшада музыкалық және спорт залдары, арнайы тренажер залы, сенсорлық бөлме, кинозал мен этнографиялық мұражай бар. Сонымен қатар Ә.Жақсыбеков 2009 жылы салынған, құрылыс және техникалық мамандарды даярлайтын кәсіптік-техникалық колледжге және Юрий Гуров атындағы №6 гимназияға бас сұқты. Көшпелі кеңес барысында Астана әкімі Білім басқармасына білім мекемелерінің инфрақұрылымын және білім беру сапасын жақсарту жөніндегі мәселелерді назарда ұстауды тапсырды. Әкім барлық білім беру мекемелерінде балаларды тамақтандырудың сапасына да назар аударды. Ә.Жақсыбеков балабақшаларда орындардың жетіспеушілігі мәселесін шешу үшін мемлекеттік-жеке меншік әріптестік саласында жұмыстарды күшейтуді, сондай-ақ ағымдағы жылы орта мектептерде үш ауысымда оқуды болдырмауды, осылайша, мектептердің шамадан тыс жүктемеленуін жоюды тапсырды.
