«2020 жылға дейін 3 жастан 6 жасқа дейінгі балаларды мектепке дейінгі біліммен қамту 100 пайызға жеткізілмек. Үш жыл ішінде біз 30-дан астам замануи мектеп салдық, Ақтөбе, Алға, Қандағашта әрқайсысы 600 орындық тағы 10 мектеп салу жоспарлануда. Жобаланған ірі мектептер апатты мектептер мен үш ауысымда оқыту мәселелерін шешеді. 2016 жылы апатты мектептер мәселесі толығымен шешіледі», - деп нақтылады А.Мұхамбетов. Сондай-ақ облыс басшысы елді мекендерді газдандыру жұмыстарының жалғасып жатқанын айтты. Алдағы екі жылда аудан орталықтары толығымен газдандырылмақ. Оған түрлі қаражат көздері тартылады, оның ішінде газ тарифін көтеру де бар. «Біз «ҚазТрансГазбен» 21 млрд. теңгеге меморандум жасаспақпыз, ол банктерден тарифтер есебінен қаражат тартады. Бүгінгі тарифіміз 5100 теңге болса, алдағы жылдары ол 8000 теңгеге дейін көтеріледі. «ҚазТрансГаз» екінші деңгейлі банктерден инфрақұрылымдық облигациялар есебінен қаражат көзін тартып, жаңа газ құбырларын салады», - деді әкім. Айта кетейік, бүінгі таңда Ақтөбе облысында 800 мың адамның 635 мыңы газбен қамтылған.
