Мектеп оқушыларының жазғы, қысқы демалыстарына ешқандай өзгеріс енгізілмейді - БҒМ

АСТАНА. ҚазАқпарат - Мектеп оқушыларының жазғы, қысқы каникул мерзімдері еш өзгермейді. Бүгін Мәжілістің Әлеуметтік-мәдени даму комитетінің кеңейтілген отырысында Білім және ғылым вице-министрі Есенғазы Иманғалиев осылай мәлімдеді. Еске сала кетейік, басқосуда бастауыш білім берудің мемлекеттік жалпыға міндетті стандарттары мәселесі талқыланған болатын. «Мектептегі жазғы, қысқы каникул мерзімдерін өзгерту мәселесіне келсек, педагогикалық ата-аналар қауымдастығының пікірлерін ескере келе, біз мектептердің қазіргі жазғы, қысқы каникул мерзімдерін өзгерту орынсыз деп санаймыз», - деді жиын барысында вице-министр Е. Иманғалиев. Еске сала кетейік, мектеп оқушыларының жазғы демалыс құрылымын өзгерту мәселесі осыдан бірнеше жыл бұрын, дәлірек айтсақ Бақытжан Жұмағұловтың министрлікке басшылық жасаған уақытынан бері талқыланып келеді. Тіпті, сол кездегі ведомство басшысы әлемдік тәжірибені, каникул мерзімін қысқартудың артықшылықтарын ескеріп, ондай өзгерістерді де жоққа шығармаған болатын. Ал бүгінгі Білім және ғылым министрі Аслан Сәрінжіпов өзінің ұстанымын білдіре келе, Қазақстанда жазғы каникул мерзімдері қысқармайтынын атап өткен болатын.

Автор: Қанат Мәметқазыұлы

Басты сөздер: ҚР Білім және ғылым министрлігі , Парламент , Білім