Ел халқының 96%-ға жуығы бүгінгі таңда мемлекеттегі этносаралық жағдайды оң бағалайды. Орталық коммуникациялар қызметінде өткен брифингте ҚР Президенті Әкімшілігі Қазақстан халқы Ассамблеясы төрағасының орынбасары – Ассамблея хатшылығының меңгерушісі Ералы Тоғжанов осындай дерек келтірді, деп хабарлайды BNews.kz тілшісі.
«Ассамблеяның осы жылдардағы басты жетістігіне еліміздің тұрақты дамуы қамтамасыз етілгенін жатқызуға болады. Тәуелсіздіктің алғашқы жылдарында көптеген адамдар, оның ішінде халықаралық сарапшылар еліміздің тұрақты дами алатынына күмәнмен қарады. Олар Қазақстан этносаралық, дінаралық даулардың ошағы дегенді алға тартқан еді. Қазақстан осы уақытта елімізде мұндай жағдайдың мүмкін еместігін дәлелдей алды. Қазақстанның полиэтникалық құрамы проблемаға айналмады», - деді Е. Тоғжанов.
Қазақстан халқы Ассамблеясы төрағасының орынбасары бірқатар нақты сандарды алға тартты. Бүгінгі күні еліміздегі этносаралық жағдайды азаматтардың 95,9 пайызы оң бағалайды екен. Ел азаматтарының 94,5 пайызы өздерін Қазақстан халқының толыққанды өкілі ретінде сезінеді. Этносаралық қарым-қатынас саласындағы мемлекеттік саясатты ел халқының 96 пайызы қолдайды.
«Бұл деректер наурыз айында жүргізіген әлеуметтік зерттеудің нәтижесі», - деп қосты ол.
Е. Тоғжанов Қазақстан халқы Ассамблеясының осы уақытта жалпыазаматтық, конституциялық органға айналғанына ерекше тоқталды.
Тілші: Айымгүл Әбілева
www.bnews.kz
