ҚР Білім және ғылым министрі Аслан Сәрінжіповтің қатысуымен болған жиында Қазақ ұлттық аграрлық университетінің байқау кеңесі құрылып, оның төрағасы тағайындалды. Байқау кеңесінің төрағасын бірауыздан Алматы облысының әкімі Амандық Баталов бекітілді. Ал ҚазҰАУ байқау кеңесіне еліміздің белді ауылшаруашылығы мекемелерінің басшылары мүше болып отыр. Енді аталған кеңес мүшесі университеттің стратегиялық дамуын бекітіп, академиялық және қаржы мәселелеріне тікелей араласа алады. Тіпті проректорды да байқау кеңесі сайлайды.
ҚР Білім және ғылым министрі Аслан Сәрінжіпов «Кеңес халықаралық тәжірбиеге сүйеніп құрылған, ол еліміздегі білім сапасын көтеріп, жоғары оқу орындары жұмысының ашықтығын көздейді», – деді. Естеріңізге сала кетейік, жаңа оқу жылынан бері еліміздің барлық мемлекеттік жоғарғы оқу орнында осындай кеңес өз жұмысын бастады. Қазақ ұлттық университетінің ректоры Тілектес Есполов ауылшаруашылығы мекемелерімен қоян-қолтық жұмыс жасап, университет мәртебесін ғылыми зерттеу орталығы деңгейіне көтеруді көздейтіндігін айтты. Ал байқау кеңесінің жаңа төрағасы Амандық Баталов Алматы облысына тың идеялар мен ғылыми жобалар қажет екенін жасырмады.
Амандық Баталов, ҚазҰАУ байқау кеңесінің төрағасы, Алматы облысының әкімі:
- Алматы облысының шаруаларына ғылым мен инновация, жаңа технологияны қолдау керек. Соның барлығын университеттің ғылымдары осы жерде жұмыс істеп отырады. Егер мұнда ғылыми база болса, Алматы облысы тәжірибелік база болады.
www.24.kz
