МЕМЛЕКЕТ БАСШЫСЫ ҰСТАЗДАР МЕН ОҚУШЫЛАРДЫ БІЛІМ КҮНІМЕН ҚҰТТЫҚТАДЫ
Жаңа оқу жылында елімізде 60-тан астам жаңа білім ұясы шәкірттерінқұшақ жая қарсы алды. Бір ғана Астананың өзінде 4 білім ошағы қолданысқа берілді. Соның бірі №75 көпсалалы гимназияда бүгін алғашқы қоңырауайрықша сән-салтанатпен соғылды. Оқу ордасының ашылу рәсіміне Елбасы Нұрсұлтан Назарбаев қатысып, жаңа оқу жылын бастаған шәкірттерге сәттілік тіледі. Оқушылар үшін биылғы алғашқы қоңырау әдеттегіден ерекше соғылды. Олар жаңа оқу жылын Елбасының ақ батасымен бастап отыр. Төбесі көкке тигендей бәрі мәре-сәре болғанымен, толқып тұрғаны байқалады. Нұрсұлтан Назарбаев, Қазақстан Республикасының Президенті: - Бүгін білім күні болып саналады. Біздің елімізде 7600 мектепте 2 миллион 600 мың бала партаға отыратын болады. Ең қуантатын мәселе, биыл 300 мың жасөспірім 1-сыныпқа барады. Олардың саны былтырғымен салыстырғанда 70 мың балаға көп. Ал осы шәкірттерді білім нәрімен сусындату үшін жаңа оқу жылының алғашқы күнінде еліміз бойынша 60-тан астам алтын ұя алғаш рет есігін айқара ашты. Бұл қадам үш ауысыммен оқитын олқылықты жоюға әсер етпек. Жаңаша жасанған білім ордасының қай-қайсысы да заман талабына сақадай сай келіп тұр. Онда инновациялық технологиялар кеңінен үйретіліп, 3 тілде сабақ жүргізілетін болады. Елбасы мемлекеттік тілді жетік меңгеріп, орыс және ағылшын тілінде де емін-еркін сөйлеу заман талабы екенін алға тартты. Нұрсұлтан Назарбаев, Қазақстан Республикасының Президенті: - Қазақстанда тәуелсіздік жылдарында 1 мың мектеп іске қосылды. Оның ішінде биыл 150 мектеп іске қосылады. Бүгін 62 мектеп есігін ашады. Астананың өзінде 11 мектеп жұмысын бастады. Ол мектептерде 300 мың мұғалім сабақ береді. Біз жасаған «Қазақстан 2050» бағдарламасы бүгінгі мектеп жастарына арналған. Мектеп партасына оқушылармен бірге Елбасының өзі де отырды. Олардың ғылыми жобаларымен танысып, білім берудегі жаңа әдістемелердің іс жүзінде қалай қолданылып жатқанын көрді. Нұрсұлтан Назарбаевпен бір партада отырған Мадина бұл сәт жадымда мәңгі жатталып қаладыдейді. Өзі өнеге тұтатын тұлғамен кездесу 11-сынып оқушысын қанат бітіріп,жаңа биіктерге жетеледі. Мадина Сағит, 11-сынып оқушысы: - Мен Елбасымен бір партада отырдым. Ол менің парталасым болды. Мен өте қуаныштымын. Себебі ол менің есімім мен қандай пәнді ұнататынымды сұрады. Нұрсұлтан Назарбаев бізге бағыт-бағдар беріп, тілек тіледі. Елбасы оқушылармен қатар ұлағатты ұстаздар қауымымен де кездесті. Ашық жарқын әңгімелесе келе, істеріне толағай табыс тіледі. Майнұр Тұрсынбекова, көпсалалы мектеп-гимназиясының оқу ісінің меңгерушісі: - Сыйымдылығы 1200 оқушыға арналған мектебімізде қазіргі таңда 1470 оқушы жиналып отыр. Мектебіміз 2 аусымда жұмыс істейді. Сонымен қоса көптеген үйірмелер, оның ішініде домбыра, вокал және тереңдетіліп оқытатын тілдер бар. Қазір ағылшын және француз тіліне үйретудеміз. Сапалы білім беру үшін оқу ордасында барлық жағдай жасалған. Заманауи техникалық қондырғылар, озық зертхана мен электронды кітапханаға дейін бар. Енді шәкірттер зейін қоя оқып, оны көңілге ықыласпен тоқыса болғаны. Авторлары: Назерке Әбдірахманқызы, Ержан Қанапияұлы, ПТРК көмегімен
